BAMBI! Embeera y’omuyimbi ButchaMan eyongedde okwonooneka, bamwongeddeyo mu ddwaaliro eddene ng’ali mu mbeera mbi

Omuyimbi Mark Bugembe amanyikiddwa nga ButchaMan agiddwa mu Malcolm Clinic e Kibuye ng’ali mu mbeera mbi era atwaliddwa mu ddwaaliro e Nakasero.

ButchaMan yakwattiddwa Poliisi ya NEMA ku Lwokuna bwe yabadde alemesa olukiiko wakati wa batuuze abakoseddwa amazzi olw’ennyanja Nalubaale (Lake Victoria) okubooga mu bitundu bye Makindye n’abakungu mu kitongole kya NEMA.
Wabula wakati ng’olukiiko lutandiise, Buchaman yatuuse ng’ali n’abakuumi be era amangu ddala yalagidde olukiiko luyimirizibwe kuba baalemeddwa okumutegeeza biki ebigenda okuteesebwako ng’omukulembeze eyalondebwa omukulembeze w’eggwanga Yoweri Kaguta Museveni okulembera ku nsonga z’omu Ghetto.
Buchaman bwe yabadde awoganira waggulu, yatabangudde olukiiko, era abasirikale ba NEMA baamukutte.
Bwe yakwattiddwa, yatwaliddwa ku Poliisi y’e Katwe era agamba nti yakubiddwa abasirikale.

Kigambibwa bwe yakubiddwa, yakoseddwa nnyo munda n’okusingira ddala mu kifuba era y’emu ku nsonga lwaki asindikiddwa mu ddwaaliro e Nakasero okufuna obujanjabi obusingawo.

Buchaman agamba nti alina okutwala Poliisi mu mbuga z’amateeka kuba yakubiddwa nnyo era erina okusasulira ssente z’eddwaaliro zonna.

The post BAMBI! Embeera y’omuyimbi ButchaMan eyongedde okwonooneka, bamwongeddeyo mu ddwaaliro eddene ng’ali mu mbeera mbi appeared first on Galaxy FM 100.2.