LABA EBITIIBWA! Bibiino ebikwata ku mukyala emekete omwogezi w’amaggye omuggya, mu Uganda akwata kyakubiri mu UPDF

Kyaddaki Omudduumizi w’eggye ly’eggwanga ow’okuntikko era Omukulembeze w’eggwanga lino Yoweri Kaguta Museveni akawungeezi k’olunnaku olw’eggulo yakoze enkyukakyuka mu ggye lya UPDF.

Pulezidenti Museveni yakyusiza omwogezi w’amagye Brig. Richard Karemire n’amusikiza omukyala Brig.Gen.Flavia Byekwaso myaka 48.

Brig. Gen Byekwaso ye mukyala asoose mu byafaayo bya Uganda okulondebwa ng’omwogezi w’amaggye mu ggwanga.

Brig. Gen Byekwaso yazaalibwa nga 29, December, 1971 mu Buganda. Yasomera ku St. Mathias Kalemba Senior Secondary School O-Level ne A-Level e Nazigo mu disitulikiti y’e Kayunga.

Brig. Gen Byekwaso

Yafuna diguli eyasooka mu by’obusuubuzi okuva ku yunivaasite y’e Makerere mu 1996 ate mu 2012, yafuna mansita mu Public Administration and Management era okuva e Makerere.

Okusinzira ku biwandiiko bye mu Palamenti, Flavia Byekwaso yayingira amaggye mu 2000 nga protocol officer era aweerezza mu bifo eby’enjawulo.

Mu 2016 ng’ali ku ddaala lya Lieutenant Colonel, y’omu ku bannamaggye 10 omuli abakyala n’abaami, abaalondebwa okukikirira amaggye mu Palamenti ye 10 okuva 2016–2021. Mu 2019, y’omu ku bannamaggye 2000 abaakuzibwa. Brig. Gen Byekwaso yakuzibwa okuva ku Colonel okudda ku Brigadier General.

Mu maggye, ye mukyala ow’okubiri okuba ku ddaala eryawaggulu oluvanyuma lwa Proscovia Nalweyiso ali ku Lieutenant general.

The post LABA EBITIIBWA! Bibiino ebikwata ku mukyala emekete omwogezi w’amaggye omuggya, mu Uganda akwata kyakubiri mu UPDF appeared first on Galaxy FM 100.2.